Philippians 4

Isicelo Sokuma Ngesibindi Lokubambana

1Ngakho-ke bazalwane bami, lina engilithandayo lengilikhumbulayo, liyintokozo yami lomqhele wami, kumele liqine kanjalo eNkosini bangane abathandekayo!

2Ngiyamncenga uYuwodiya loSintikhe ukuba bavumelane eNkosini. 3Ngiyakucela mhlobo wami oqotho, siza abesifazane labo abasebenza lami kanzima ngenxa yevangeli, kanye loKlementi labanye engisebenza labo, abalamabizo abo asencwadini yokuphila.

Ukukhuthaza Kokucina

4Thokozani eNkosini kokuphela. Ngiyatsho futhi ngithi: Thokozani! 5Ukuthobeka kwenu kakubonakale kubo bonke. INkosi isiseduze. 6Lingakhathazeki kodwa ngazo zonke izikhathi bikani izicelo zenu kuNkulunkulu ngokukhuleka, ngokuncenga langokubonga. 7Ukuthula kukaNkulunkulu okudlula ukuqedisisa konke kuzabusa inhliziyo zenu lezingqondo zenu kuKhristu uJesu.

8Okokucina bazalwane, konke okuliqiniso, lokulesithunzi, lokulungileyo, lokuhlambulukileyo, lokuhle, lokubukekayo, nxa ulutho luluhle kakhulu loba lubongeka, cabangani ngezinto ezinje. 9Loba kuyini elikufundileyo loba elikwamukeleyo loba elikuzwileyo kuvela kimi, loba elikubonileyo kimi, kwenzeni. UNkulunkulu wokuthula uzakuba lani.

Ukubonga Izipho Zabo

10Ngiyathokoza kakhulu eNkosini ngokuthi khathesi selize lavuselela ukungikhathalela kwenu. Impela kade likhathazeka kodwa lingelalo ithuba lokukubonakalisa. 11Kangitsho lokhu ngenxa yokuthi ngiyaswela ngoba sengafunda ukwaneliseka kuyo yonke imimo. 12Ngiyakwazi ukuba ukuswela kuyini njalo ngiyakwazi ukuba kuyini ukuba lokunengi. Sengafunda imfihlo yokwaneliseka kuzozonke izimo, langabe ngiyasutha loba ngilambile, loba ngilokunengi kumbe ngiswela. 13Ngingazenza zonke izinto ngaye onginika amandla.

14Kodwa kwakukuhle ukuthi lihlanganyele lami ekuhluphekeni kwami. 15Phezu kwalokho, lina bantu baseFiliphi liyakwazi ukuthi ensukwini elaqala ngazo ukwazi ivangeli ngesikhathi ngisuka eMasedoniya, akukho lalinye ibandla elahlanganyela lami endabeni yokupha lokwamukela ngaphandle kwenu kuphela; 16ngoba langesikhathi ngiseThesalonika langithumela usizo kanengi lapho ngidinga uncedo. 17Akusikuthi ngifuna isipho kodwa ngifuna okuzakuba yinzuzo kini. 18Sengamukele umvuzo ogcweleyo lodlulisileyo; ngiphiwe okwaneleyo njengoba khathesi sengamukele ku-Ephafrodithusi izipho elazithumelayo. Zingumnikelo wephunga elimnandi, umhlatshelo owamukelekayo lothokozisa uNkulunkulu. 19UNkulunkulu wami uzakugcwalisa konke ukuswela kwenu ngenkazimulo yenotho yakhe kuKhristu uJesu.

20Udumo kalube kuNkulunkulu uBaba kuze kube nini lanini. Ameni.

Ukuvalelisa

21Bingelelani bonke abangcwele abakuKhristu.

Abazalwane abalami bayalibingelela.

22Abangcwele bonke bayalibingelela, ikakhulu labo abangabendlu kaKhesari.

23Umusa weNkosi uJesu Khristu kawube lomoya wenu.